Buwan ng mga Akdang Pinoy 11: “Ang Nalalabi Rito” ni Nikka Osorio

by Abner Dormiendo

20160808_070317

Sa mga tula ni Nikka Osorio sa “Ang Nalalabi Rito”, hinaharap ng makata ang eksistensyal na krisis ukol sa layunin—o masasabing “telos”, marahil—ng paglikha ng sining. Ano ang nais nating makamit sa paggawa ng pinta, pelikula, o kahit ng tula? Ano ang nais mahuli? Damdamin? Kagandahan? Nakakuwadrong imortalidad? Para kay Osorio, hindi naman natatapos ang isang obra. Sa gayon, sabay din niyang kinikilala na dahil walang-hanggan ang proseso ng paglikha, bahagi ng sining ng pagsisining ang pagpapaubaya. Mula sa mga tulang pinamagatan niyang “Di Tapos na Obra”, hanggang sa paghalaw niya ng mga alinsunurang tula mula sa iba pang sining tulad nina Picasso at Kosinski, pinalulubag ng mga tulang ito ang pinakamalalim na takot na bumabagabag sa mga pintor at makata sa loob ng bawat isa: Hindi man natatapos ang sining na ginawa, ang nalalabi rito matapos nating mawala ang magpapatuloy ng ating nilikha. Isang sipi mula sa “Imahen”:

“At sa dami ng hindi masasabi,
inaasahan kita.

Lagi, naghaharap tayo:
kapuwa tahimik bagaman puno
ng kahulugan ang sadyang makita ka.”

Advertisements